Weekly Guidance 2025 /// September 29 to October 5

Aries (March 21 to April 19): Ang pagtatago ng kahinaan ay maaaring magsilbing depensa, ngunit may mga pagkakataong hindi ito ang pinakamainam na hakbang. Sa ngayon, inaanyayahan kang kilalanin ang iyong mga kahinaan at limitasyon—hindi upang sumuko, kundi upang maiwasan ang mga komplikasyong dulot ng labis na tapang. Huwag hayaang manaig ang pride; sa halip, yakapin ang kababaang-loob. Hangga’t maaari, harapin ang anumang sitwasyon sa maayos, marangal, at may edukadong paraan.

Taurus (April 20 – May 20): May mga pagkakataong ang mga pagsubok na pinagdadaanan mo ang nagiging daan upang makita mo kung gaano ka kahalaga sa isang tao. Sa mga panahong ito, maaaring mas lalo pang tumibay ang damdamin mo para sa isang relasyon—mapa-pamilya, kaibigan, o kapareha. Yakapin mo ang mga sandaling ito; iwaksi ang pagdududa at piliin ang kaligayahan. Iwasan ang masyadong pagkalulong sa drama.

Gemini (May 21 – June 21): Maaaring magdulot ng pakiramdam ng pagkabahala o kawalan ng direksyon ang unti-unting pagbagal ng takbo ng mundo—lalo na kung ang mga bagay ay hindi umaayon sa iyong mga inaasahan. Sa ngayon, inaanyayahan kang bigyang pahinga ang iyong isipan mula sa labis na pag-aalala at pagdududa sa sarili mong mga pasya. Sa pagtatapos ng linggong ito, asahan ang pagdating ng isang magandang balita na maghahatid ng panibagong pag-asa at sigla sa iyong puso.

Cancer (June 21 – July 22): Sa linggong ito, maaaring maantala ang iyong mga plano na kumalas mula sa isang proyekto, relasyon, o samahan. Ito’y dahil sa ilang bagong kaalaman o pangyayari na maaaring pumukaw at magpalambot ng iyong damdamin. Kung may mga alitan o hindi pagkakaunawaan, posible itong maresolba sa paraang magdudulot ng kagaanan sa iyong kalooban. May mga kasagutang darating na magbibigay sa iyo ng kaliwanagan, na siyang magiging daan tungo sa mas makabuluhang mga pasya.

Leo (July 23 -August 22): Maaaring itinutulak ka ng kasalukuyang sitwasyon na lumabas sa iyong comfort zone at higitan ang iyong nakasanayang kakayahan. Napapanahon din ang pagdating ng isang oportunidad na maaaring magdagdag sa iyong pinagkakakitaan. Para sa mga naghahanap ng part-time o karagdagang mapagkakakitaan, ito ay isang positibong balita. Gayunpaman, nangangailangan ito ng sipag, tiyaga, at dedikasyon. Isantabi ang mga opinyon ng iba at unahin ang iyong mga pangangailangan. Walang dapat ikahiya sa marangal na hanapbuhay

Virgo (August 23 – September 22): Tingnan ang sitwasyon mula sa isang mas makatotohanang perspektibo, at hindi batay lamang sa iyong mga ilusyon o haka-haka. Minsan, nagiging mapaglaro ang ating isipan—maari tayong malinlang kung hindi natin babalansehin ang ating iniisip sa mga konkretong katotohanang nasa harapan natin. Ang ganitong paraan ng pag-iisip ay makatutulong upang maiwasan ang mga pabigla-biglang desisyon at kilos na maaaring magdulot ng sakit ng ulo sa kalaunan.

Libra (September 23 – October 22): Maaaring maging abala ang linggong ito, at dahil sa pagod, posibleng madaling uminit ang iyong ulo. Hangga’t maaari, iwasan ang makasagupa ng kapwa na may mainit ding ulo upang mapanatili ang iyong enerhiya at makaiwas sa hindi kinakailangang gulo. May isang oportunidad na maaaring dumating, ngunit maaari mo itong makaligtaan kung hindi ka magiging alerto at mas uunahin ang pansamantalang kasiyahan. Samantalahin muna ang pagkakataong ito upang makapaghanapbuhay at mapalago ang iyong kabuhayan.

Scorpio (October 23 – November 21): Inaanyayahan kang panatilihin ang malinaw na presensiya ng isipan upang maging mas maayos ang iyong pag-priyoridad sa mga kailangang gawin. Iwasan ang mga padalus-dalos na kilos na maaaring pagsisihan sa bandang huli. Para sa mga may karelasyon, gaano man kabigat ang pressure na nararanasan, huwag itong ibaling sa iyong kapareha. Sa halip, iparamdam ang iyong pagpapahalaga sa kanya. Patuloy na palaganapin ang malawak na pang-unawa sa isa’t isa at sa buhay.

Sagittarius (November 22 – December 21): May mga samahan na maaaring mas lalo pang tumibay at lumalim. Para sa mga single, ito ay maaaring senyales ng pagpasok sa isang mas seryoso at committed na relasyon. Para naman sa iba, may posibilidad na muling magbalik ang isang dating kapareha—at ang muling pagtatagpong ito ay maaaring maghatid ng linaw sa mga hindi natapos na isyu ng nakaraan. Marami rin ang makakaramdam ng mas malalim na pagnanais na tuklasin ang kanilang sarili at ang tunay na layunin sa buhay. Huwag mag-alala, sapagkat darating ang mga kasagutan sa tamang panahon.

Capricorn (December 22 – January 19): Minsan, mas madali itong isipin kaysa sa aktwal na maranasan. Kahit gaano pa kalawak ang iyong pang-unawa at kahit gaano mo pa paalalahanan ang sarili na tanggapin ang isang masakit na katotohanan, hindi pa rin maiiwasang maapektuhan. Paalala ito mula sa uniberso na sa pagkakataong ito, bigyang-pansin ang tunay mong pagpapahalaga at pagmamahal sa sarili. Magnilay kung naipapakita mo ba ito sa iyong mga kilos at desisyon—at kung hindi pa, panahon na upang ito’y higit pang paigtingin. Ang mga kaganapan ay nagtuturo lamang sa iyo na mahalin ang sarili nang mas buo at patatagin pa ang iyong pananampalataya.

Aquarius (January 20 – February 18): Ang mga kasalukuyang pangyayari ay nagtuturo sa iyo na maging responsable sa bawat kilos at desisyon na iyong ginagawa. Paalala rin ito na kapag alam mong hindi ito makabubuti sa iyo at sa mga taong nasa paligid mo, iwasan mo nang gawin upang hindi lumala pa ang mga epekto na kailangang harapin. Tandaan, kahit magkamali man, posible pa ring itama ang lahat at makapagsimulang muli ng mas maayos.

Pisces (February 19- March 20): May ilan na maaaring nagpapanggap pa rin dahil umaasa, ngunit mahalagang magmuni-muni ka kung nagiging makabuluhan pa ba ang iyong mga ginagawa. Maging tapat sa iyong nararamdaman at huwag lang basta sumusunod sa impluwensya ng mga tao sa paligid mo. Ang payo ng isang pinagkakatiwalaang tao ay maaaring makatulong nang malaki, lalo na sa paglikha ng mga pagbabagong nais mo sa iyong buhay.